【股市脈搏】萬達酒店派特息須過一關

【Now財經台】萬達酒店發展(00169)股價今早(10日)平開後向下，持續偏軟，上午交投疏落，股價一度跌5%，低見0.6元。集團中午出通告後，股價午後倒升兼有成交配合，最多升逾8%，高見0.65元，收市報0.62元，升逾3%，成交股數較過去100日大增13倍。

萬達酒店發展中午公布，董事會上周通過批准喺完成出售酒店資產後，派特別息0.462元，仲多過每股帳面值，以昨日(9日)收市價0.6元計，股息率高達77厘，相當和味，但股價午後最多僅升8%，形成好大反差，不過，今次派息仲有一關要過，就係股東特別大會。

今次派特別息最受惠一定係持股65%嘅大股東萬達地產，其實亦係大股東減債嘅手法，相信要過董事會呢關應該冇問題，不過，股東特別大會通函已多次延遲，最新指唔會遲過6月24日召開股東特別大會，後市要留意係咪真係開得成。