【息賺】何啟聰:若美股債齊升都唔會持久

【Now財經台】「Trump Trade」持續發酵，比特幣(Bitcoin)價格又破頂，美股亦升唔停，市場睇好美股牛市可延續至明年，不過，美債息都同時扯高，10年期債息一度升穿4.5厘。有分析指，長債息有可能升至5厘，會唔會出現股市及債息同時大升嘅情況？

獨立市場策略師何啟聰指，有可能出現呢個情況，但估計唔會持續好耐，因為投資者會比較股市同債市嘅回報，如果股市長期回報唔及債市，資金就會由股市回流債市。佢又指，近期「Trump Trade」令部分股票持續大升，市場唔想錯過呢浸升勢，所以資金又重返股市。不過，當特朗普(Donald Trump)明年正式上任後，投資者可能食糊離場，屆時資金又會重返債市。

Ivan又指，若特朗普上任後，好快落實參選時提出嘅政策，就會令美國通脹升溫，市場會擔心美國政府嘅財政健康，繼而令長債息升得更急。