【名家給力場】「金融黑洞2.0」殺埋身？(下)

【Now財經台】美股噚晚重挫，其中，道指瀉逾500點，美國銀行股成跌市災區，主要畀兩單消息拖冧，首先係加密貨幣銀行Silvergate宣布關閉，其次係矽谷銀行母公司SVB爆流動性危機，呢兩件事影響有幾大？會唔會持續發酵變成另一個炸彈？

勝利瑞柏基金管理合伙人暨投資總監陳建良指，其實呢個炸彈一直存在，隨著聯儲局要持續加息遏通脹，會影響好多資產價格，如果銀行買長債或者投資冇乜流動性嘅產品，一旦利息上升，而喺借短買長下，如果後者跌就要面對liquidity crunch，邊間會爆係好難講，但會產生漣漪效應，佢認為呢個效應已經發酵咗，好多人都有誤解，加息就要買銀行股，KL認為，首先要諗下點解要加息，唔係因為經濟好而加息，反而係被逼加息，資產價格會下調，銀行可能要面對違約潮。

KL續指，舊年出現「金融黑洞」，科網股因為加息喺10月冧價，依家似乎進入「金融黑洞2.0」，資產泡沫離開科技股進入生活層面。