【名家給力場】「4‧2」係美股大日子

【Now財經台】美國總統特朗普(Donald Trump)將會喺下周三(4月2日)公布新一輪關稅措施，政策公布前，市場充斥不確定性及憂慮，對美股後市有咩影響？上半年個頂係咪已經見咗？

冠域商業及經濟研究中心主任關焯照認為，美股應該已見頂，依家最大問題係業績期就快殺到，而市場對政策嘅不明朗嘅憂慮太大，所以大部分企業嘅業績指引都比較保守，其中，聯邦快遞(FedEx)下調咗全年指引，美國達美航空(Delta Air Lines)就調低首季收入及盈利預測，企業指引保守一般都會拖低股價。

關博士續指，就算係過去兩年表現強勁嘅「科技七雄」(Magnificent 7)，股價都要受壓，暫時表現最強勢嘅Facebook及Instagram母公司Meta，股價都只係可以守住600美元，所以整體美股都因為業績期來臨而變得唔太樂觀，現階段係易跌難升。

佢又話，依家最重要係4月2日公布嘅新關稅政策，如果同之前差唔多，投資者憂慮細咗，美股有機會輕微反彈。