【專家分析】戰略性產業勢成中美貿戰「風眼」

【Now財經台】美國原定今日(4日)起向加拿大、墨西哥及中國貨品加徵關稅，但美國總統特朗普(Donald Trump)同墨西哥總統辛鮑姆(Claudia Sheinbaum)及加拿大總理杜魯多(Justin Trudeau)傾完電話後，宣布關稅措施押後1個月生效，但中國就如期今日加關稅，中方即時公布一系列反制措施，反制力度又夠唔夠？

信達國際研究部董事趙晞文指，內地出手反制係預期之內，其中，中國會向美國進口嘅能源類、機械類及汽車類商品加10%至15%關稅，同美國加徵嘅幅度差唔多，相信中國係考慮到一旦加關稅幅度大過美國，美方有機會進一步加關稅，繼而造成惡性循環。

佢又話，中國亦針對戰略原材料實施出口管制，但其實呢項措施喺「特朗普1.0」時代已經用過，佢又預期，戰略性產業如半導體、科網及生物科技等，未來會喺中美角力之間扮演更重要角色。