【期匯決算】Yen見160可買入博短線反彈

【Now財經台】日本厚生勞動省今早(9日)公布，當地基本工資按年升2.7%，錄得32年最大升幅，推動名義工資升3%，超預期，數據係咪足以支持日本央行喺兩周後嘅議息會議加息？還是要等埋2025年3月俗稱「春鬥」嘅春季勞資談判，之後再作決定？

亨達集團助理總經理羅明立指，日央行對加息相對審慎會令市場失望，所以日圓回落到158至160水平。日央行一直希望工資可以持續增長，但通脹又同時升溫，如果日央行唔透過加息應對通脹，就會蠶食工資增長帶嚟嘅消費效應。

Patrick又話，日央行應該要繼續貨幣政策正常化，因為美國聯儲局放慢減息步伐，日央行唔應該繼續等美國減息。佢估計，日央行有機會喺短期內加息，而當日圓接近160水平時，可以考慮買入博短線反彈。