【FINTERVIEW】美股呢3個板塊再炒Trump Trade風險大

【Now財經台】東亞銀行財富管理處發表2025年第1季投資展望，環球股市方面，喺美國總統當選人特朗普(Donald Trump)上個任期出現「紅色浪潮」期間，標指累升約33%，「特朗普2.0」時代月底就來臨，市場普遍共識係美股喺2025年會延續2023及2024年強勢，如果真係咁，標指今年上半年目標應該定喺邊個水平？

東亞銀行財富管理處高級投資策略師陳偉聰表示，標指今年上半年目標大約介乎6178點至6335點，同現水平比較有約10%上升空間，但係一個較中線嘅目標，短期而言，指數反覆波動嘅機會較大。

Jason續指，過去兩個月，美股嘅金融、科技、非必需消費等板塊，受惠於「特朗普交易」 (Trump Trade)已升咗一浸，估值已偏高，因此，短期再炒Trump Trade風險會較大，如果預期仍有上升空間，必須密切留意市況變化，因為大市有可能先行回調及整固。