【名家給力場】特朗普上任後！玩港股可吼呢個板塊

【Now財經台】美匯指數持續強勢，今日(3日)一度升穿109水平，美國總統當選人特朗普(Donald Trump)將會喺2025年1月20日上任，意味加中國貨關稅嘅日子愈嚟愈近，呢啲因素都不利人仔，究竟應該點投資好？

冠域商業及經濟研究中心主任關焯照指，特朗普本身就係最大不明朗因素，因為佢所有政策都會推高通脹，不利股市。佢又話，美元強勢係因為長息扯高，而長息升意味通脹預期轉強，亦代表投資者沽美國長債，但仍持有美元。值得留意係，美元強勢亦同歐元疲弱有關，歐元兌美元已失守1.03。

關博士認為，短期而言，喺美元強勢下，亞洲股市都應該冇乜運行，而隨著特朗普上任，好多消息及政策都會落實，政策細節會逐步曝光，睇返大環境係對港股及A股不利，因為美國係唔會「放過」中國。佢建議投資者可以考慮保守型股票，但要喺內地推政策後立即行動，如果唔想跟咁貼，就可以考慮防守型板塊。