【期匯決算】人民幣反彈幅度大

【Now財經台】繼高盛調高人民幣匯率預測後，大摩最新將人民幣年底預測，上調至6.65兌一美元，較現水平升值約2%，同時調高今年內地經濟增長預測至5.7%。人民幣中間價連續兩日大幅轉強逾600點子，今日開市報6.7611兌一美元，而在岸、離岸價早段繼續強勢，兩大美資行同時唱好中國資產，重啟經濟開放之路，係咪真係咁順暢呢？

資深外匯分析師陳欣指，近期人民幣反彈幅度大，主要係因為美元轉弱，好多其他貨幣都有受惠。另外，內地放寬防疫限制同開關等，市場對中國經濟復甦嘅憧憬都推升人民幣。但要留意返，依家嘅經濟數據較差，例如製造業處於收縮水平，零售及出入口數據都係跌緊，國家好需要精準嘅政策去刺激返經濟，不確定性仍然存在。另外，降準或減息等寬鬆貨幣政策雖然利好經濟，但對人民幣難有正面影響，人民幣強勢亦會削弱出口，相信人民幣匯率中長線可能在6.7至6.8兌一美元上落。