【名家給力場】股市見底兩大指標(上)

【Now財經台】雖然美股今年開局出師不利，但有分析認為，美股連跌兩年並唔常見，更預期美股今年好大機會回升，不過，如果講股市見底，港股係咪會快過美股？

「股市漁夫」創辦人莊志雄表示，見底有兩個條件，首先係要沽嘅人已經沽晒，香港之前好明顯係，聽到最差嗰日有基金經理宣布香港科技股已經清咗倉，而宣布後就啱啱見底。即係話當投資者悲觀到一個程度，跌到15000點就睇10000點，當市場出現呢啲極度悲觀情況，股市係有機會見底。

佢續指，其次係睇基本因素，估值係咪去到歷史低位，依家美股肯定唔係，美股跌咗逾20%後，標指經周期調整市盈率仍有20倍以上，歷史低位一般係10幾倍，通脹失控年代甚至見過單位數。

Lewis認為，港股可以睇高一線，因為恒指已跌到低過帳面價值，怛恒指係咪可以見底回升，暫時仍未肯定，但大市有15%至30%股份已經見咗低位，即有啲股份唔會跌穿舊年低位，但唔代表恒指唔會再探底，因為美股未跌完，就有機會拖累恒指。