【財經TOP SEARCH】旭輝「股債雙殺」有貨要減磅

【Now財經台】截至早上11時止，1小時內《彭博》用戶關注度上升最多港股，依次為旭輝控股(00884)、吉利汽車(00175)、長江基建集團(01038)、創科實業(00669)及中電控股(00002)。

據內媒報道，旭輝董事局喺內部信件中表示，雖然集團帳面有逾300億人仔現金，但因為政府收緊監管資金提取而用唔到，加上市傳旗下1家天津公司未有如期還債，旭輝今日「股債雙殺」，股價插穿1元，曾低見0.93元，半日急瀉近26%，報0.94元，而1隻2024年到期美元債更錄得有紀錄以來最大跌幅。內房債危機仲未見出路，旭輝市值得返約85億元，股價係咪都危危乎？

獨立股評人譚智樂指，就算係跌幅冇咁多嘅內房股，都仲有下跌空間，而旭輝股價短短個幾星期由2元跌至唔夠1元，如果小股東揸咗好耐，依家唔應該溝貨，反而係時候考慮減持。

Arnold又話，即使現時內地多個城市陸續放寬樓市限購令，但經濟疲弱令剛性需求減少，估計賣樓收入會繼續減少，而唔少內房趁2018年當局收緊樓市監管時，逆市發債擴張，又有好多表外負債，依家經濟下行，加上到期還債，呢場內房債務危機就逐漸浮面。