【專家分析】中遠海能有貨明年都唔使「落船」？

【Now財經台】航運股中遠海能(01138)今日逆市破位，見52周高位，集團噚日舉行投資者日，指對第4季油運市場行情樂觀，原因係超大型油輪(VLCC)8月起持續復甦，加上燃油價格下跌，令日均收益有改善，又話行業正處於加快重塑石油貿易格局過程中，投資者日係咪中遠海能今日大升嘅「推手」？

英皇證券研究部總監陳錦興指，雖然中遠海能中期業績麻麻地，但近幾個月股價走勢強勁，反映對集團未來業績及營運前景樂觀，投資者日就進一步確認呢個情況，由於投資者日主要畀國內基金參與，所以見到中遠海能AH股齊升。

Stanley又話，當成個行業表現向好時，中遠海能有逾160艘嘅大型船隊，營運槓桿特別明顯，佢估計，中遠海能明年盈利表現將十分強勁，相信股價仍有能力向上突破。