【FINTERVIEW】息口趨升揀銀行股還是地產股？

【Now財經台】行政會議召集人葉劉淑儀接受《彭博》訪問時指，本港考慮免除內地買家雙倍印花稅，噚日消息一出，地產股應聲抽高，但政府之後澄清冇傾過亦冇相關計劃，地產股即刻升少大截，今朝就跟隨大市向下，喺息口趨升下，銀行股及地產股投資價值有幾大？

光銀國際董事總經理兼研究部主管林樵基估計，本地銀行股會跑贏少少，因為息差係拉闊緊，如果本地經濟進入咗復甦階段，一定對銀行有正面影響。

至於本地地產股，Benny就話依家有幾家發展商賣緊樓，開價都貼近二手，加上最近成交少，其實加息嘅影響已經開始咗，H按已經升咗唔少，但如果要等加P先有影響，呢個機會就好微，雖然發展商的確係審慎咗，但本地地產商實力仍然幾強，加上舊年賣樓收入今年入帳，所以唔使太擔心業績，而睇業績時應留意核心盈利及現金流。