【名家給力場】美經濟危站衰退邊緣

【Now財經台】市場今個星期焦點除咗聯儲局加息外，其實今晚都好重要，因為美國會公布第2季GDP數據，市場預期按年會錄得0.3%嘅升幅，扭轉第1季嘅跌勢。

臻享顧問董事總經理王良享指，呢個預測係基於大部分經濟學家認為，美國勞工市場仍然暢旺，上次非農職位增長逾40萬個，有別於亞特蘭大聯儲銀行所嘅GDP Now數據，依家估計係負1.3%，而第1季係負1.6%，即連續兩個季度錄得負增長，意味陷入技術性衰退，但美國係唔會承認，就要留待NBER公布，美國到底係咪衰退，由於權重有唔少放喺就業市場，所以點解好多人估計美國經濟明年先有機會出現衰退，因為勞工市場仍然健康，所以就唔承認衰退。