【FINTERVIEW】內地通脹料維持2%至3%
【分析】 2022/07/11 11:22
【Now財經台】國統局前日出咗6月內地居民消費價格指數(CPI),同埋工業生產者出廠價格指數(PPI),通脹較市場預期高,CPI按年升2.5%,衝上2年高位,除咗豬肉價格持續向上,汽油及柴油價格升幅亦擴大。隨著內地局部放寬防疫措施,豬肉價格亦升返,內地通脹未來會唔會繼續維持喺較高水平?
光銀國際研究部主管林樵基指,之前幾個月通脹較低,係因為食品價格,即豬價,對沖能源價格好多,今次通脹升返,見到豬價似乎開始橫行,唔係好似以往咁向下調,加上基數問題,會睇到豬價係有持續上升空間,能源價格居高不下,食品嗰邊一路升,通脹自然會升。
佢又話,但以國際準則嚟講,內地通脹仍然喺一個好低嘅水平,而同官方目標3%仍有一段距離,由於未來嘅形勢可唔同,例如能源及食品價格回落,呢啲因素都會令內地通脹維持喺2%至3%。
林樵基 光銀國際董事總經理兼研究部主管 |