【now.com財經】 以前，我唔知道老人家所講「你有張良計，我有過牆梯」是點解，但後來我見到有外匯管制的國家，人們可以從黑市渠道將資金匯入或者匯出，原來外匯管制是張良計，黑市渠道是過牆梯。
有人問我有冇用虛幣交易，本來是沒有，但有一次，我打算賣走一個在有外匯管制國家的物業，但心大心細，雖然價錢唔錯，但賣走之後又唔可以將資金調回香港，買家知道之後話不如用虛幣交易，我記起外匯管制雖然是張良計，但虛幣可能是過牆梯，於是大膽嘗試，最後交易成功，當時虛幣曾經大跌，不少人笑我做錯決定，好彩我沒有欠債，可以等到虛幣大升的時候才賣走。
近日虛幣跌到阿媽都唔認得，立刻有不少世界名人表示虛幣是一個騙局，應該一文不值，傻人才會買。老實說，虛幣已經跌了咁多，唔講兩句安慰說話都唔好落井下石，正是今日留一線，第日好相見，況且投資的事，就好似今年高考重點題目「紅樓夢」裡面所說，假作真時真亦假，真作假時假亦真。日元是真的，一樣可以跌很多。
其實不用擔心玩虛幣的人，就好似一個入賭場的人，如果他只買圍骰，注碼一定唔會大，唔會輸死，倒不如讓那些人早日了解逢賭必輸道理，他們就不會沉迷賭博，小注怡情或者會有。叫人唔好玩虛幣，倒不如讓那些人早一日認識虛幣，早一日中箭早一日離場，唔好好似星架坡仔中足三箭，現在想翻身都難。
