【專家分析】美股今輪靠傳統股撐

【Now財經台】市場憂慮科技股增長前景，美股噚晚走勢反覆，社交平台Snapchat母公司Snap發盈警，股價暴瀉43%，連招股價都穿埋，更拖低Meta、Twitter及Pinterest等相關股，而個別零售股如A&F業績後急挫28%，美股業績期嘅壓軸業績大走樣係近年罕見，不過，道指一度挫逾500點，但收市倒升，喺零售股業績並非一面倒失色下，美股係咪仲有一定韌力？

艾德證券期貨投資策略總監文錦輝指，美股係有韌力，加上投資者對傳統經濟始終有啲憧憬，但跌到現水平都唔敢買高估值嘅科網股，反而會買返啲傳統經濟股，所以道指就可以拗腰升返上去。

佢又話，市場上星期突然炒經濟衰退，爭相避開高風險資產，後市要留意聯儲局下次議息出完議息聲明後，會唔會有另一番景象。