【專家分析】舜宇或調整全年出貨目標

【Now財經台】舜宇光學(02382)噚日出咗4月營運數據，手機攝像模組出貨量按年跌逾19%，雖然手機鏡頭、車載鏡頭出貨量有得升，但仲未去返1月嘅水平。爆發疫情以來，舜宇股價屢試新低，今日再失守「紅底股」，反映市場似乎唔滿意最新出爐嘅數據，其實4月整體出貨情況係咪意料之內？

股評人李偉傑指，舜宇4月嘅營運數據其實唔差，尤其手機鏡頭出貨量喺近期嚟講已經算多，不過，由於依家嘅出貨數據同全年目標仲有一段差距，市場擔心舜宇嘅經營狀況未必咁快改善到，加深市場對舜宇全年出貨量唔達標嘅憂慮，Jason估計，舜宇年中有機會調整出貨量目標。