【now.com財經】噚日指數喺上半場高衝上去18,000點樓上之後，升幅有見收窄。去到噚日下晝2點半左右，升幅收窄到喺日線圖上已經見到長長嘅上影線，所以喺電台上都講定聲喺日線圖有機會出「射擊之星」，且指數六連升之下，即使指數唔向下回調都好，策略上都要轉為且戰且走。
咁樣嘅陰陽燭形態喺日線圖上面，都真係怪不得今日仍然有唔少熊證進駐，第二層18,100至18,199點仍然見過千張期指街貨。地球另一邊嘅牛證最貼價仍然企住喺17,200至17,299點嘅範圍裡面，同噚日收市價比都仲有500幾點嘅距離。正路諗阿市如果要繼續食街貨嘅話，點都似係向上殺熊；只不過技術走勢，再加埋噚晚開始播第一集嘅秋官...
結果，今朝恒指完U再升多96點，報17,843點；及至開市後首段時間，指數仍然咬住喺高位徘徊，不過，首五分鐘指數喺高位咬完之後，依家9點38分，恒指升幅已經收窄到升29點，報17,775點，稍稍低於小時圖10線，作戰室本身都Set定好倉睇下指數有無得跟U盤方向行多兩步，偷一兩格咁，奈何線企唔到，偷位出動嘅幾時都可以，要守一段時間嘅注今唯有等多一等先出得。
點解睇小時圖條10線睇得咁緊？皆因呢條線自上個星期一(4月22日)至今一直都無見失過，就算噚日收市口價計指數低於10線，但今日火速收復失地。10點未到指數喺呢條線上面彈出彈入，搞到大家心情都有啲緊張，唯有一邊吹住閒水，一邊一齊舒緩一下緊張嘅心情(過份緊張真係好容易會做錯事架)
終於等到10點，見指數上落其實都唔係好大，喺五分鐘圖上見指數有似行出「三角形」，至於小時圖上見指數仍然踩住10線，似乎呢條線都幾夠力。
試多次條小時圖10線，恒指牛(56350)，收回價17,295點，同現價有約480點距離，為市場上最貼價牛證中槓桿最高，有約35.56倍槓桿，都真係咬好小時圖10線先好呀！
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容《開市前速報》，七日免費試用：https://www.patreon.com/join/cbbcwar
