我的股票

    名稱 現價 升跌

    資料報價延遲十五分鐘

    【盤房來料】舜宇受中興拖累回吐可吼位撈

    【工業】 信報財經新聞 2018/06/13 13:05

    【信報財經新聞】隔晚美股表現硬朗,道指微跌一點,但標指跟納指仍然上升,市場觀望今晚聯儲局議息,加息基本上無懸念,但目前估計加息幅度去到0.5厘嘅專家去到16%,咁就算下半年只係再加多一次0.25厘息,實際上等同加息四次。加息幅度會否出人意表仍屬未知數,但會後議息聲明更受關注。人哋美股喺各大央行議息前企硬,但港股似乎有啲腳軟,噚日死守31000水平,但成交確係少得可憐,缺乏資金入場支持,今日港股回吐壓力更大。

    話咗港股跟美股相關系數減少,跟內地股市關係則日益加深,今日港股腳仔軟,主要係內地股市確係弱過藥煲,阿Man之前已溫馨提示,六月係內地傳統上資金較為緊絀,皆因半年結前,銀行收水,上市公司又要填氹核數,總之就係銀根緊,股市亦難升。上證指數又跌逾20點,拖累國指跌近1%,半日報收12090點,跌116點。至於恒指低開112點後,雖然一度重上31000水平,見過31023點,但其後內地股市愈跌愈多,恒指跌幅亦擴大至218點,低見30884點,半日報收3910點,跌192點。半日成交411.7億元,唯一跌市較為安慰,沽壓唔算太嚴重,繼續薄弱嘅成交,大戶要舞上舞落易如反掌。

    5月份內地社會融資規模創近2年新低,內銀股沽壓未減,4大行半日跌0.7%至1.3%。之前幾日北水一直狂沽內銀股,春江鴨知水暖,擺明知道去槓桿搞到啲銀行無啖好食,當然沽之而後快。

    另一個受壓板塊當然係手機設備股,中興通訊(00763)終獲美國解禁,代價之大至少要花上三幾年時間去養傷,股價預咗一開市插水三四成,半場收市跌近四成,股價報收報15.48元。有人認為中興已獲解禁,前景點都唔會太差,但唔好忘記解禁其中一個條件,係美國再認為佢有唔妥,可以隨時再禁過.......呢個係未來中興一個好大嘅不明朗因素,喺公司重傷過後,至少要觀察一段時間,確保公司重新振作,先好再諗入貨。至於有意短炒博反彈,先問自己有冇小李飛刀嘅小李咁好身手,否則咪亂接飛刀,一於少理就算數罷就。中興暫時當然接唔過,但其他手機設備股似乎有些少無辜,瑞聲(02018)更跌逾4%為表現最差藍籌。阿Man反而認為可以望住另一龍頭舜宇(02382),噚日剛破頂,今日隨整個板塊回吐,股價若然跌至10日線,約165元水平見支持,可以考慮撈一撈再博股價向上挑戰180元。

    手機設備股死死吓,貨金即流去炒半導體股,中興事件令中國痛定思痛,唔要仰人鼻息,中國半導體未來條路要加快腳步,半導體股未來應可受惠政策傾斜,前景值得睇好。至於呢期阿Man推介嘅體品股繼續做好,都係嗰句,未轉勢咪持有先,破頂唔估頂,見掟彎返轉頭咪施施然落車。

    麥狄文
    (徐狄怡‧證監會持牌人)

    想睇更多財經消息