我的股票

    名稱 現價 升跌

    資料報價延遲十五分鐘

    【盤房來料】息魔殺到淡友佔上風

    【資訊科技業】 信報財經新聞 2018/04/16 13:02

    【信報財經新聞】美英法聯軍空襲敍利亞未見震散環球股市,周日中東股市更顯著上升,而道指期貨亦見反彈,帶動港股今早高開。可惜港匯價格持續喺7.85弱方兌換保證附近徘徊,金管局數度出手捍衛港元,終令拆息抽高,今早HIBRO顯著上升,隔夜拆息由上周五0.10857厘,急升至今早0.18411厘,而三個月拆息亦升至1.25714厘。拆息上升終令港股急回,息魔殺到淡友佔上風,今早港股高開低走。

    恒指今早高開41點,報30850點係半日高位,開市即掉頭向下,先後失守20日線(約30687點)及100日線(約30581點),其後跌幅進一步擴大至552點,低見30256點,跌穿10天線(約30348點)。其後跌幅略為收窄,10日線失而復得,恒指中午報30355點,跌452點;國企指數報12031點,跌229點。

    股王騰訊(00700)確係不幸地被肥央燈死咗,自佢爆響口睇好騰訊,兼且表示喺405元接咗貨之後,騰訊連埋今日已四連陰,上半場一度低見399.2元,散戶喺400元曾築起血肉長城亦一攻即破。騰訊半日報收401.8元,之前都講過405元並非鐵底,散戶仍唔淆底入場,當然係相信其基本因素不變之下,長線仍然睇好,不過肥央講嘅兩年變金牛股應該有難度,自騰訊失守頸線427元之後,走勢轉差已成事實,家陣只有寄望之前低位398元守得住,否則仍要下試375元甚至更低水平。

    上星期阿爺放風話今年樓市唔會再加大調控力度,以為內房股可回復強勢,誰不知今日內房股又捱沽,始終未能擺脫上落市格局,總之呢期都係只能夠吼低位撈貨,高追十次八九中伏。除咗內房股捱沽,中資金融股沽壓亦唔少,內銀股及內險股普遍跌2%或以上。上星期都講過,大市自月初低位29400點水平反彈過千點,逼近三萬一點又遇阻力,再追貨值博率大減,話口未完今日返嚟大市又走樣,家陣10日線岌岌可危。由於牛證重貨區喺30100-30200水平,大戶只要輕輕質低多兩三百點,又一堆牛仔要陣亡,大戶好淡通殺情況未變,有心買貨不如耐心等多一兩日,待牛證重貨區清除再考慮撈底。

    之前提過大家便宜莫貪,咪以為俄鋁(00486)大跌五成,半價發售就以為有平貨執,家陣講緊公司有遺約危機,隨時關門大吉,而美俄關係持續緊張,侵侵為要證明自己跟通俄門事件無關,定必出盡辣招對付俄羅斯。俄鋁今日再跌逾兩成,創1.58億元上市新低,目前走勢係踩住地板咁向下插,短期內難見反彈,大家咪貪平多手撈貨。

    麥狄文
    (徐狄怡‧證監會持牌人)

    想睇更多財經消息

    相關股票