我的股票

    名稱 現價 升跌

    資料報價延遲十五分鐘

    【輪證贏家】收爐啦!

    【金融業】 信報財經新聞 2018/02/14 11:12

    【信報財經新聞】噚日恒指早段係咁上,曾升逾700點,最高見過30169點,真係嚇死人;可惜呢道氣維持唔到,拆恒指5分鐘圖你就見到個市向下行,30000點得而復失,日線圖上最終以「倒T星」嘅樣(個底係穿咗少少嘅)收工。今朝恒開市又再上返30000點,但拆開恒指5分鐘圖嚟睇,暫時走勢你會見到呈「圓頂」。

    坦白講年近歲晚,大市靜局就必然架啦,不過傳統上大家都會博一博新年第一擊個市會開個紅盤出嚟賀一賀佢,有圖有真相,大家睇睇2009年己丑牛至上年丁酉雞農曆新年首個交易日第一吓嘅開市表現、單日收市表現同全個農曆年嘅表現。(今年要等埋聽日完咗半日市粒數先計到,但唔使計大家都知係升定跌啦,爭在升幾多啫。)

    從上表中可以見到過去九年裡面有六次係開紅盤;而首日報升嘅就有五次,以機會嚟計嘅話就分別係66.7%同50%,所以話年頭開紅盤呢樣嘢真係唔係百發百中,但當見到開市表現個機會率係多過一半嘅時候,再加上年初五(2月20日)就己經有滙豐控股(00005)同恒生銀行(00011)出業績嚟撐場,咁嘅情況之下,首日開市開紅盤應該難度唔高嘅,可以揀定隻恒指Call係聽日吼恒指5分鐘圖上SlowSTC(14,3)見超賣時小注一入,坐過年博第一下開紅盤時就即刻閃人;當然啦,若然聽日開出嚟個恒指跌到媽都唔認得嘅話,咁就算吧啦!

    點解咁早講定聽日嘅嘢?事關為咗可以同我老媽同舅父Eric去行吓花墟買花過年,所以返埋今日就收爐,係度預先祝各位新年進步!三財入庫!狗年行大運!

    又適逢今日情人節,小妹喺度祝大家甜甜蜜蜜!開開心心!日日都係情人節咁Sweet!

    《輪證贏家》初五啟市!(放假mode啟動!)

    作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
    電郵:gladyshan@gmail.com

    想睇更多財經消息