我的股票

    名稱 現價 升跌

    資料報價延遲十五分鐘

    標籤: 地產

    【樓宇法律】計清租約時間

    【地產】 2020/04/08 14:00

    【now.com財經】一個住宅業主同租客簽訂租約,為期兩年;但係租約上面計算日子就計咗三年。

    兩年過去,租客無搬走。業主向土地審裁處申請收樓,理由係兩年租約完結前,已經向租客發出收樓通知。

    租客向土審處提出反對,因為租約上面租期日子計到去三年;所以佢只願意喺三年完結時先至搬出。

    業主反駁,日子計算寫法係錯嘅。其實業主之前同租客簽過兩份租約,都係兩年。

    不過,今次呢張租約就騎呢啲,由租客按照舊租約抄寫過去,甚至租金都無變。租客亦承認,佢抄租約時,係參照原有租約年期,然後先至去推算日子。

    法庭考慮過相對可能性(balance of probability),認為租約係兩年機會較大;因為如果租期轉為三年嘅話,計算日子時就會較為小心,寫錯嘅機會就會較少。

    根據「文件解釋不利於條文提出者」嘅法律原則(contra proferentem rule),如合約條文模稜兩可,法庭會採取一個對文件起草一方較為不利嘅法律詮釋。

    既然租客承認租約係由佢抄寫,甚至租金不變;所以佢提出三年租期嘅講法,相對兩年對佢有利。

    按此,法庭就採納一個對租客較為不利嘅法律詮釋,租約係兩年期。於是,法庭頒令租客必須將單位交返畀還業主。

    依單案教訓我地,草擬合約嘅一方要額外小心,因為有拗撓時,法律會傾向另一方。

    (法庭案件編號:LDPD 663/2018)

    香港測量師學會會員陳家欣

    想睇更多財經消息