我的股票

    名稱 現價 升跌

    資料報價延遲十五分鐘

    【輪證下半Part】二線underlying難搵輪

    【輪證】 2020/01/16 14:29

    【now.com財經】明明今朝低開後高走仲升得好地地,但見到技術指標勢頭向下有啲怪怪,二話不說跟手又倒跌返落嚟,依家2點5分,恒指做緊28784點,升10點。咁chok法對於可以做到即日來回trade嘅投資者嚟講,絕對係爽到無論,這邊廂一早開好倉,升到超買晒就放手再轉陣開淡倉,咁樣來回一轉,呢個鐘數都應該可以收工。

    但事實係,有幾多個可以捉得到咁準?捉得到又係咪有咁嘅時間可以做到來回trade?做得到又揀唔揀得啱用嘅輪證落場?唔係天時、地利同人和咁簡單,仲要加埋運氣同膽識先可以。

    見個市同粒海膽一隻咁巉手,於是又向個股埋手。呢期講得比較多啲個股,好似小米(01810)、美團(03690)、騰訊(00700)都無乜睇頭;再睇返啲有一段時間無見過嘅個股,好似滙控(00005)、友邦(01299),搵到中海外(00688)時,咦?係你啦!

    中海外喺輪場計都算係二線underlying,日線圖見由上年12月11日開始,SlowSTC(14,3)一直保持於嚴重超買水平,而股價就築起咗一條「上升通道」,至1月3日見高位$31作高開低走,同步SlowSTC(14,3)亦已高位回落,條SlowSTC(14,3)形態上就一浪低於一浪咁落到依家接近中軸水平,但股價圖上今日一支大陽燭爆起,打破咗之前由高位回落而行出嚟嘅形態,14RSI就當然唔執輸,今日亦見反彈啦。

    開埋條保歷加通道出嚟睇,此前高位下行同時見保歷加通道明顯收窄,今日陽燭爆出,通道口隨即有拓闊跡象。日線圖上SlowSTC(14,3)雖然唔係由超賣開始上,但若然保歷加通道真係配合,將通道口持續擴大比位佢行嘅話,中軸上返去超買位又有乜所謂。

    唯獨要小心嘅係條DMI嘅ADX,咁大支陽燭抽上去,ADX都唔跟升,反而下行,唔通呢一彈係無力嘅?Search過之後先發現原來中海外無牛,得Call,有三隻輕微價外Call講緊係2月尾至3月初到期,所以槓桿有12至13倍,比起其他嘅5倍鬆啲多好多,呢啲就係末日輪比你嘅「等價交換」。

    坦白講就算真係無睇錯隻中海外,但都搵唔到啲合適嘅工具落場,呢啲咪得個睇字囉。

    作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

    電郵:gladyshan@gmail.com;FB:輪證贏家

    想睇更多財經消息