我的股票

    名稱 現價 升跌

    資料報價延遲十五分鐘

    【樓宇法律】剔除案件無咁易

    【地產】 2018/05/29 09:48

    【now.com地產】持有或者使用物業嘅人,同其他人間中有爭執,在所難免。一旦攪到要上法庭,雙方燒銀紙唔在講,勝敗難料,輸咗官司又賠堂費,正係賠了夫人又折兵!所以一旦被人控告,被告一方就有時諗計,向法庭申請,將案件剔除。

    一間喺香港仔某大廈地下至三樓經營嘅老人院,向土地審裁處控告四楼單位滲水,要求四樓業主(連同業主立案法團)維修消除滲水之外,並且追討損失。老人院嘅指控係基於四樓有僭建,喺履行屋宇署嘅清拆令之後,因為欠缺妥善修葺,以致平台破損,導致滲水。

    四樓業主就申請剔除案件,理由係(一)無合理訴因(因為防水層係公用部份,所以唔應該就防水層破壞而向佢追討);(二)無聊瑣碎(frivolous);(三)無理纏擾(vexatious);與及(四)可以影響或延遲公平審訊(may prejudice or delay the fair trial)。

    土審處認為大廈公契有明文條款規定四樓業主有責任維修佢嘅單位,所以無合理訴因作為剔除理由唔成立。況且,老人院呈有專家報告具體指出滲水情況同裝修費用,指控清晰,並非無聊瑣碎。再者,幾年前雙方已經喺法庭交過手,今次亦非無理纏擾。至於話會嘅影響或延誤公平審訊嘅理由,係全無根據。所以,土審處撤銷四樓業主剔除傳票嘅申請,並且要支付今次申請嘅訟費。

    (法庭編號LDBM 37/2017)

    香港測量師學會會員陳家欣

    想睇更多財經消息

    相關股票