我的股票

    名稱 現價 升跌

    資料報價延遲十五分鐘

    【盤房來料】港股企穩100日線後何去何從

    【分析】 信報財經新聞 2018/02/13 13:17

    【信報財經新聞】隔晚美股繼續反彈,多得侵侵嘅基建大計,以及債息從高位回落,令市場信心開始回穩,帶動港股喺夜期及ADR時段顯著回升,港股今日反彈。恒指今早裂口高開390點,升幅曾略為收窄見29826點半日低位。不過內地股市經阿爺金口一開後,連續第二日反彈,上證指數重上3200水平,帶動港股升幅擴大至最多709點,半日最高見30169點。恒指中午收報30102點,升642點或2.2%;國企指數中午收報12200點,升300點。

    騰訊(00700)回升3.5%,成功收復50日線,中午報收424.2元;平保(02318)彈力更強,半日升4.4%,報收82.95元,但仍未收復50日線。至於港交所(00388)亦收復50日線,半日升3.7%,報收267.6元。其他重磅股普遍升2%或以上,只有大笨象(00005)升1.3%,表現較為輸蝕,而中移動(00941)更逆市向下尋底,半日再跌0.1%。

    早兩日跌勢急且狠嘅內房股,跌得愈甘彈得愈急,今日升幅最低消費2%以上,唔少內房股升逾半成,由MSCI中國小型股指數過檔中國指數成份股嘅旭輝(00884),更為一度升逾一成,半日升6.5%。手機設備股亦有同樣效應,呢個板塊噚日已率先回升,今日升勢持續,雖然曾成為大戶棄嬰,但股價較高位大幅調整後,估值回到較為合理水平,有見資金從新吸納,而舜宇光學(02382)發盈喜,集團預期去年盈利將按年大幅增長逾1.2倍,刺激股價曾升10.5%見逾兩個月高,半日升7.3%。其他蘋果概念股普遍造好,升幅由2%至接近一成不等。

    噚日阿Man講過,只要大市暫停再玩過山車,逐步穩定落嚟,港股回穩後方能有條件反彈,而收復100日線並企穩為後市去向關鍵,結果大市噚日波幅收窄後,今日即見反彈。不過暫時大市仍未完全脫險,雖然100日線已收復,但11月份高位30200點前有阻力,怕反彈至呢個水平又繼續反覆。港股幾時何以肯定調整完成,除咗唔再沉迷過山車之外,企穩100日線並回補對上一個下跌裂口30400係另一重要任務,當然之前提過,月底前大市能重上31600-31700點回補巨型下跌裂口,月線圖將出現長腳見底訊號,只要外圍亦定落嚟,月底踏入業績期後,港股才有機會迎來新一輸升浪。總之大市未能重上31600點,暫時仍然處於調整反覆整固格局。

    麥狄文
    (徐狄怡‧證監會持牌人)

    想睇更多財經消息