我的股票

    名稱 現價 升跌

    資料報價延遲十五分鐘

    【盤房來料】騰訊港交拍住上孖住回

    【分析】 信報財經新聞 2017/11/14 12:45

    【信報財經新聞】花旗魚缸隔晚靠穩,目前等緊稅改方案,花旗缸邊友按兵不動。至於港股表現反覆,早段高開再創近十年新高,但A股唔生性,港股亦跟隨回落。恒指高開89點,最多升132點,見29320點半日高位,其後A股下跌,港股亦被拖累,一度倒跌38點,見過29143點半日低位,中午報收29198點,僅升15點;國指繼續跑輸,半日跌45點,報收11639點。

    友邦(01299)經大摩祝福過,新高再新高,半日升1.53%,盤中曾創67.45元上市新高,睇嚟呢次70元無乜走雞。至於騰訊(00700)高開低走唔多老利,早段高開394元以為業績前偷步有運行,誰知開市價已經係半日高位,半日報收389.2元,392元企唔穩,似乎有人存心壓價,唔畀騰訊喺業績前發圍。阿Man講過騰訊一定要企穩392元先有運行,睇嚟明日放榜前未能先偷步突破。

    至於內險股連升多日後,又要抖抖氣,平保(02318)叫做仲有些少升,其他內險股回吐,但相對累計升幅,今日嘅回吐幅度絕對可以接受。內銀股相對無乜本事,普遍腳軟,同樣跌幅尚算溫和,暫時未見買盤積極掃貨,難以對大市帶嚟動力。

    除咗騰訊先升後回,早段拍住騰訊齊齊上嘅港交所(00388),同樣拍住齊齊回吐,早段見過238.8元高位,喺240元之前又卻步,講到底港交所上面層層蟹貨,難以一口氣坐直昇機,唯有分段五蚊五蚊咁向上爬。不過阿Man認為喺港股牛三之際,成交額只會有增無減,中線表現仍值得睇好,目前未到終點站,只係需要時間逐步攀升,唯有畀多些少耐性。

    至於三個火車頭中最落後嘅大笨象(00005),未能借助季績之力變身小飛象,喺短期未見有其他好消息嘅情況下,大笨象股價都係呆吓呆吓,今日更跌至75元邊沿,走勢認真麻麻,注意75元支持位不容有失,要扭轉目前弱勢,除非股價升穿76元企穩。

    水泥股做好,由於內地基建持續活躍,預期第四季度建材需求回升,建材水泥股今日做好,多隻水泥股升幅由接近2%至4%不等。噚日有粉絲問吉利汽車(00175)點睇,呢段時間一直高位反覆整固,阿Man教路粉絲可繼續持貨。只要升穿27元靠穩,新高可期,果然今日半場升6.2%,再創28.3元新高。

    麥狄文(徐狄怡‧證監會持牌人

    想睇更多財經消息