我的股票

    名稱 現價 升跌

    資料報價延遲十五分鐘

    標籤:地產

    【樓宇法律】安裝太陽能 村屋三層變四層?

    【地產】 2020/04/01 15:00

    【now.com財經】政府為咗吸引新界小型屋(俗稱「村屋」)業主申請「上網電價計劃」,於是放寬新界村屋天台同埋低密度私人樓宇安裝太陽板嘅限制,高度由1.5米放寬到2.5米,可以佔天台一半面積。

    不過,放寬措施或有鼓勵村屋搭多半層之嫌,皆因天台太陽能棚頂搭好之後;如果四邊圍封起來,實質就即係變咗四層。

    雖然有人拗頸,因為話係三層半2.5米係等如一層樓咁上下高。

    根據《建築物條例(新界適用)條例》,新界小型屋嘅高度唔超過三層高、高度唔超過8.23米(即27呎),而有蓋樓面唔超過65.03平方米(即700平方呎)。

    不過,屋宇署又規定,如果單梯樓宇嘅最高樓面層喺地面水平以上超過13米,咁天台就要作為住戶火警逃生地方。

    因為單梯樓宇只有一堂樓梯,嗰堂樓梯就要伸到去天台樓面。

    一旦發生火警,住戶走火逃生就可以走到去天台樓面等待救援,又唔會使到濃煙積聚喺屋裡面,無法散走。

    村屋天台搭咗太陽能棚,再將四邊圍封,實質就即係四層;而太陽能棚面就變相成為村屋天台。

    如果太陽能棚頂面喺地面水平以上超過13米,樓梯就要通到太陽棚頂面。

    當然,一般情況下,村屋業主都唔會將樓梯搭到去太陽能棚面上面。

    所以,圍封太陽能棚架,好容易就形成僭建,會受到屋宇署警告,甚至檢控。

    香港測量師學會會員陳家欣